Rannsóknir sýna að nemendum gengur yfirleitt betur á prófum sem eru tekin á pappír heldur en á rafrænu formi. Það þýðir ekki að við eigum að hætta að nýta stafrænar lausnir, en þetta er mikilvægt að hafa í huga svo við getum dregið úr þeim mun sem rafræna prófið hefur á frammistöðu nemenda.
Ef ég ætti að taka stærðfræðipróf, myndi ég kjósa að gera það á pappír. Þá get ég undirstrikað lykilatriði, teiknað myndir við dæmin, skrifað hjá mér spurningar og athugasemdir. Einnig get ég auðveldlega merkt við þau dæmi sem ég er viss með og þau sem ég ætla að skoða betur ef tíminn leyfir. Í rafrænu prófi eru þessi möguleikar takmarkaðri.
Ef ég vissi að prófið yrði rafrænt, myndi ég hafa hjá mér krassblöð til að vinna með hverja spurningu. Ég myndi skrifa númer dæmis og svo teikna og skrá hjá mér lykilupplýsingar, ásamt því að vinna í því að reikna dæmið. Það væri aldrei alveg eins og að taka prófið á pappír, en það myndi hjálpa mikið!
Góðu fréttirnar eru að prófakerfin eru sífellt að þróast og batna. Prófakerfið sem notað verður í Matsferlinum fyrir 4. – 10. bekk í mars 2026 leyfir nemendum meðal annars að merkja við þau dæmi sem þeir eru vissir með, sem hjálpar mikið við skipulagningu á meðan prófinu stendur.
Skólar geta haft áhrif á frammistöðu nemenda, með því að undirbúa nemendur vel fyrir þetta nýja prófaumhverfi. Það felst meðal annars í að leyfa þeim að æfa sig í prófakerfinu og kenna þeim námstækni sem þeir geta nýtt sér í prófinu: hvernig þeir vilja nálgast prófið, hvað þeir geta gert þegar þeir festast og hvernig þeir geta skipulagt tímann og forgangsraðað dæmum.
Ég hlakka til að fylgjast með hvernig þessi próf þróast næstu árin. En ég hef líka áhyggjur af nemendum í skólum þar sem tæknibúnaður er af skornum skammti. Þegar kórónuveirufaraldurinn skall á, kom berlega í ljós hversu mismunandi staðan er milli skóla hvað varðar aðgengi að tækjum. Þetta er sá nemendahópur sem ég hef mestar áhyggjur af þegar kemur að þessum prófum, einfaldlega vegna þess að þeir eru ekki vanir að vinna verkefni í tölvu.
Sumir skólar eru vel búnir tækjalega séð, til dæmis þar sem hver nemandi er með sína eigin með Chromebook fartölvu og í Kópavogi eru nemendur með sína eigin spjaldtölvu.
Hefur þitt barn aðgang að tæki frá skólanum sínum?
Gyða stærðfræðikennari
hjá stærðfræði.is