Það eru spennandi (og talsverðar) breytingar framundan í grunnskólakerfinu. Í haust tekur endurbætt aðalnámskrá gildi og í lok skólaársins, nánar tiltekið í mars 2026, verður nýr matsferill lagður fyrir.
Þessi matsferill var prufukeyrður í mars síðastliðnum fyrir um 7000 nemendur í 26 skólum. Næsta vor verður hann svo lagður fyrir alla nemendur í 4. til 10. bekk. Skólarnir fá fjögurra vikna svigrúm til að leggja prófið fyrir og niðurstöður eiga að berast nánast samstundis. Til að fylgja niðurstöðum eftir verða svokallaðar verkfærakistur aðgengilegar, en útfærslan á þeim er ekki alveg komin á hreint enn.
Það er þó ljóst að matsferillinn verður ekki notaður sem lokamat í 10. bekk, né heldur við inntöku í framhaldsskóla, það er pólitísk ákvörðun. Matsferillinn er fyrst og fremst hugsaður sem stuðningstæki fyrir nemendur, foreldra og skóla.
Þetta þýðir að vonir um samræmt námsmat sem leysir bæði lokaeinkunn í 10. bekk og einkunnaverðbólgu, eru ekki að rætast.
Ein tillaga sem hefur komið fram frá starfsmanni hjá MMS er að þeir 3–5 framhaldsskólar sem njóta mestrar aðsóknar taki upp inntökupróf. Það myndi veita ákveðinn sveigjanleika og taka við þar sem matsferillinn sleppir.
Mín mótrök eru hins vegar þessi: Þegar kemur að stærðfræði, þá eru allir framhaldsskólar að fást við það vandamál að lokaeinkunn í 10. bekk endurspeglar ekki endilega stöðu nemenda í stærðfræði. Til að hægt sé að raða nemendum í stærðfræðiáfanga í framhaldsskóla, eftir getu og hæfni, þá vantar framhaldsskólunum réttmæta, samræmda mynd af stöðu hvers og eins nemanda. Þar gæti matsferillinn, ef hann er vel útfærður, skipt sköpum.
Í næsta sunnudagspósti ætla ég að segja ykkur smá leyndarmál sem fáir vita um grunnskólastærðfræðina í framhaldsskólum og kemur eflaust flestum á óvart!
Ertu með einhverjar spurningar? Ef svo er, hikaðu ekki við að hafa samband með því að svara þessum pósti.
Bestu kveðjur,
Gyða stærðfræðikennari
hjá stærðfræði.is