Rannsóknir sýna að nemendur sem standa höllum fæti í stærðfræði og nemendur sem eru að læra að tileinka sér nýtt efni, þurfa skýra og beina kennslu. Ekki dularfullar þrautir eða lausnaleit á eigin spýtur, heldur leiðsögn sem byggir smám saman upp skilning og sjálfstraust. Það er ekki fyrr en nemendur hafa náð virkilega góðum tökum á efninu sem uppgötvunarnám fer að skila árangri.
Hvernig lítill stuðningur getur skaðað nám byrjenda?
Rannsóknir sýna að lágmarks stuðningur getur haft margvísleg neikvæð áhrif á óreynda nemendur (Kirschner o.fl., 2006).
- Vinnsluminnið verður ofhlaðið
Nemendur sem standa höllum fæti eða eru að læra nýtt efni skortir nauðsynleg skemu (hugræn kort til að flokka og tengja upplýsingar) í langtímaminni til að skipuleggja nýjar upplýsingar. Þegar þeir þurfa að leita að lausnum á eigin spýtur, veldur það gífurlegu álagi á vinnsluminnið, sem hefur takmarkað pláss. Þetta álag stuðlar ekki að námi, því orkan fer í að leita að lausn frekar en í að byggja upp þekkingu. - Villur festast
Ef enginn leiðréttir misskilning strax, þá geta ranghugmyndir festst í langtímaminni nemenda. Nemendur þurfa reglulega endurgjöf eða leiðréttingu til að koma í veg fyrir það. - Nemendum fer aftur
Nemendur með litla undirstöðuþekkingu geta í raun fengið lægri einkunn á lokaprófum en þeir fengu á undirbúningsprófum, ef þeir fá lítinn stuðning og leiðbeiningar. Þetta bendir til þess að skortur á stuðningi geti beinlínis skaðað nám. - Uppgötvunarnám tekur tíma
Óstýrt uppgötvunarnám er oft óhagkvæmt. Nemendur eyða miklum tíma í blindgötur og fara rangar leiðir, á meðan bein og skýr kennsla leiðir til mun dýpri skilnings og betri hæfni til að yfirfæra þekkingu á ný viðfangsefni.
Aðeins þegar nemendur hafa náð mikilli sérþekkingu geta þeir farið að stýra námi sínu sjálfir án mikillar utanaðkomandi aðstoðar. Niðurstaðan er sú að kennslufræðilegar aðferðir ættu að byggja á vísindalegri þekkingu um starfsemi heilans og gagnreyndum kennsluaðferðum, fremur en hugmyndafræðilegum vangaveltum.
Við getum ekki ætlast til að nemendur hugsi eins og stærðfræðingar, ef við kennum þeim ekki fyrst það sem stærðfræðingar vita.
Bestu kveðjur,
Gyða stærðfræðikennari
hjá staerdfraedi.is
PS. Heimild
Kirschner, P. A., Sweller, J., & Clark, R. E. (2006). Why minimal guidance during instruction does not work. Educational Psychologist, 41(2), 75–86. https://doi.org/10.1207/s15326985ep4102_1