Vissir þú að efnið sem er kennt í 10. bekk er miklu meira en það efni sem er kennt í framhaldsskóla, fyrir þá nemendur sem ná ekki B í stærðfræði við lok 10. bekkjar?
Nemendur sem ná ekki B við lok 10. bekkjar, þurfa að sækja um í framhaldsskóla sem býður upp á stærðfræðiáfanga á þrepi 1. Nemendur sem fá C eða C+, þurfa þá að taka einn áfanga á þrepi 1, en þeir sem fá D eða D+ þurfa að taka tvo áfanga á þrepi 1.
Af þeim foreldrum og kennurum sem ég hef rætt við, þá gera flestir ráð fyrir að grunnskólastærðfræðin (stærðfræðiáfangar á þrepi 1) sem kennd er í framhaldsskólum sé sambærileg því efni sem tekið er fyrir í 10. bekk – en svo er ekki.
Í flestum grunnskólum, þá eru nemendur í 10. bekk að fara í:
- Allt um þríhyrninga
- Reglu Pýþagórasar
- Prósentur og vextir
- Persónuleg fjármál
- Líkindareikning
- Annars stigs föll
- Hornafræði
- Flatarmál og rúmmál
En þetta efni, sem talið er upp hér að ofan, er almennt ekki kennt í grunnskólastærðfræðinni í framhaldsskólum þ.e.a.s. í þessum áföngum á þrepi 1.
Það sem kennt er í grunnskólastærðfræðinni í framhaldsskóla, er efni sem skiptir mestu máli að hafa góðan grunn í, fyrir áframhaldandi stærðfræðinám í framhaldsskóla. Sem betur fer eru flestir grunnskólar einnig að fara ítarlega í það efni líka.
Hérna er listi yfir þær áherslur í grunnskólastærðfræði í framhaldsskóla:
- Forgangsröðun aðgerða
- Almenn brot (samlagning, margföldun, deiling)
- Veldi og rætur
- Margföldun liðastærða
- Þáttun
- Algebrubrot
- Jöfnur og jöfnu hneppi
- Bein lína í hnitakerfi
Ég er búin að vera að kenna stærðfræði, í kennslustofu, á framhaldsskólastigi frá árinu 2013 og ég veit að grunnskólastærðfræðin sem er kennd (eftir að stytt var í 3 ár) er það mikilvægasta upp á framhaldið. Auðvitað getur maður einhvern veginn rökstutt að allt í stærðfræði skiptir máli og allt er mikilvægt, en ef við hugsum út frá áframhaldandi framhaldskólanámi, þá er kannski óþarfi að fara yfir svona mikið efni í 10. bekk og leggja frekar áherslu á grunninn sem skiptir mestu máli.
Jo Boaler (2022), prófessor við Stanford háskólann í Bandaríkjunum skrifaði um það í nýjustu bók sinni Math-ish, að skólar væru oft að kenna miklu meira en þeir þyrftu og kennarar upplifðu mikla pressu að þurfa að komast yfir ákveðið efni á hverju skólaári. En það séu atriði sem skipta meira máli upp á áframhaldandi stærðfræðinám og það sé gott að minnka frekar námsefnið og ná að vinna í færri verkefnum sem dýpka skilning.
Eða eins og mikið er skrifað um í fræðunum þegar kemur að stærðfræði: Don’t cover the curriculum, uncover it!
Ástæðan fyrir þessum pósti er bara að velta fram spurningunni:
Ætti grunnskólastærðfræðin í framhaldsskóla að endurspegla meira námsefnið í 10. bekk eða ætti hún að leggja áherslu á að undirbúa, þá sem höfðu ekki nægjanlegan grunn eftir grunnskólann, vel fyrir áframhaldandi stærðfræðinám í framhaldsskóla?
Ég er líka að velta þessu fyrir mér, því að ég veit um marga nemendur sem gætu auðveldlega skráð sig í fjarnám í stærðfræði í einhverjum framhaldsskóla og náð grunnskólastærðfræðinni þar, þrátt fyrir að eiga í erfiðleikum með að fara yfir allt þetta efni sem farið er yfir í 10. bekk í flestum skólum.
Hefur þú einhverja skoðun á þessu? Finnst þér að efnið í 10. bekk ætti að vera sniðið þannig að það undirbúi nemendur sem best fyrir nám í framhaldsskóla?
Bestu kveðjur,
Gyða stærðfræðikennari
hjá stærðfræði.is
PS. Heimild
Boaler, J. (2022). Math-ish: Finding creativity, diversity, and meaning in mathematics. HarperOne.