Listin að spyrja góðra spurninga í stærðfræði, er ekki að spyrja „hvernig reikna ég þetta dæmi?”, því þá mun kennarinn sýna nemandanum hvernig hann reiknar dæmið, sem þarf alls ekki að vera eins og nemandinn myndi gera það. Í kjölfarið heldur nemandinn að hann kunni ekki að reikna dæmið, missir sjálfstraust og fer að reyna að hugsa eins og kennarinn.
Góð stærðfræðispurning er aftur á móti „kennari, getur þú séð hvað ég er að gera rangt?”, því þá þarf kennarinn að fara í gegnum það sem nemandinn var að gera og finna út hvar misskilningur á sér stað og veita honum stuðning þar. Þá sér nemandinn að hann var að gera fullt rétt og hvað hann lærði með því að fá smá hjálp.
Ef það eina sem gervigreindin gerir, þegar þú biður um hjálp með eitthvað dæmi, er að segja þér nákvæmlega skref fyrir skref hvernig hún myndi fara að því að reikna þetta dæmi, þá læra nemendur ekki mikið.
Það eru búin að vera til gervigreindar smáforrit í stærðfræði í mörg ár, en sú aðstoð felst yfirleitt í því að segja nemendum nákvæmlega hvað eigi að gera. En það er því miður lítil hjálp, nema nemandinn kunni efnið nokkuð vel.
Ég nota sjálf mest smáforritið PhotoMath. Ég myndi segja að PhotMath nýtist mest þeim sem hafa góðan grunn og vita nokkurn veginn hvað þeir eru að gera.
PhotoMath nýtist síst nemendum sem vantar grunn í efninu sem þeir eru að vinna með. Tökum jöfnu sem dæmi. Ef nemandinn skilur ekki hvernig jöfnur virka og biður PhotoMath að reikna fyrir sig eitt jöfnu dæmi, þá er mjög líklegt að hann skrifi lausnina bara upp og þurfi svo strax aðstoð við næsta dæmi.
Aftur á móti nemandi sem hefur verið að vinna með jöfnur og skilur út á hvað þær ganga, en lendir svo í því að eiga í erfiðleikum með eitt jöfnu dæmi, þá græðir þessi nemandi heilmikið á að biðja PhotoMath um að leysa dæmið því hann mun skilja útreikningana og getur rannsakað sjálfur hvers vegna hann fékk ekki rétt svar.
Ég nota PhotoMath til að spara mér tíma að fara yfir verkefni. Þá tek ég mynd af dæminu og ef nemandinn er með ítarlega útreikninga og fær sama svar og PhotoMath – þá þarf ég ekkert að skoða það nánar og gef honum strax rétt fyrir dæmið.
Aftur á móti ef nemandinn fær ekki sama svar og PhotoMath, þá þarf ég að leggjast í rannsóknarvinnu og fara í gegnum alla útreikningana til að finna út hvers vegna hann fékk annað svar. Stundum fá nemendur rétt fyrir dæmið, þrátt fyrir að hafa ekki fengið rétt svar, enda snýst lausn á stærðfræðiverkefnum ekki alltaf eingöngu um „svarið” heldur ferlið sem leiðir til svarsins.
Einnig hvet ég nemendur sem eru að undirbúa sig fyrir próf og fá æfingapróf til að leysa heima, að nota PhotoMath til að sjá hvort þeir fái rétt svar.