Rannsóknir sýna að nemendur (og reyndar allir) eru um 30% líklegri til að muna staðreyndir og aðferðir sem vekja forvitni eða áhuga, heldur en ef þeir eru að læra efni sem þeim finnst leiðinlegt (Abdaal, 2025).
Þannig að ef við viljum að nemendur muni það sem þeir eru að læra í stærðfræði, þá hjálpar mikið að efnið sé áhugavert eða veki forvitni. En hvernig náum við því?
Ein leið er að þjálfa nemendur í að tileinka sér rannsóknarhugarfar þegar þau vinna í stærðfræði. Þegar nemendur spyrja sig spurninga og rannsaka, þá eru þeir í raun að kveikja eigin áhuga og forvitni um stærðfræðina.
Fyrir suma foreldra getur verið ógnvekjandi að styðja börnin sín í stærðfræði, sérstaklega ef eigin skólaganga í stærðfræði var erfið. En allir foreldrar, óháð fyrri reynslu, geta hjálpað sínum unglingi, til dæmis með því að hjálpa honum að búa til rannsóknarspurningar. Þegar nemandi hefur spurningu sem hann vill leita svara við, verður stærðfræðin strax markvissari og áhugaverðari.
Rannsóknarspurningin þarf ekki að vera flókin eða djúp. Hún gæti t.d. verið: „Af hverju fæ ég ekki rétt svar, þó ég hafi leyst svipað dæmi rétt á undan?“ Slíkar spurningar eru frábærar og geta hjálpað nemendum að taka framförum.
Bestu kveðjur,
Gyða stærðfræðikennari
hjá stærðfræði.is
Heimild:
Abdaal, A. (2025). Feel good productivity: How to do more of what matters to you. Penguin Books.