Núna fer að styttast í að grunnskólarnir klári. Það eru margir nemendur að fara í próf í komandi viku og vikuna þar á eftir. Því ætla ég að láta þennan pistil fjalla um eitthvað sem getur nýst þínum unglingi til að undirbúa sig fyrir stærðfræðipróf.
Ég er búin að skrifa vikulega pistla í rúmlega fimm ár sem gera í heildina hátt í 300 greinar. Ég hef tvisvar sinnum skrifað um hvernig nemendur geta undirbúið sig markvisst fyrir stærðfræðipróf, svo ég ætla ekki að skrifa um það sama aftur, heldur taka aðeins annað sjónarhorn á undirbúning fyrir stærðfræðipróf sem ég hef ekki komið inn á áður.
Hvað er hægt að gera til að minnka prófkvíða þegar kemur að stærðfræði?
Rannsóknir (Agarwal o.fl. 2014; Smith o.fl., 2016) sýna að virk upprifjun (e. retrieval practice) minnkar prófkvíða hjá nemendum.
Virk upprifjun er þegar við erum búin að koma upplýsingum í langtímaminnið og erum að æfa okkur í að sækja þær upplýsingar og þar með styrkja þær tengingar. Þegar nemendur mæta í próf, þá eru tengingarnar sterkari og auðveldara að sækja upplýsingarnar í langtímaminnið.
Viðamikil rannsókn Dunlosky og félaga (2013) sýndi einmitt fram á að æfingapróf (e. practice testing) væru ein besta námstæknin. Virk upprifjun og æfingapróf er sami hluturinn, þar sem við erum að nýta virka upprifjun þegar við erum að leysa æfingapróf. En æfingapróf þarf ekki að vera æfingapróf í bókstaflegum skilningi. Þegar við erum að prófa okkur sjálf í einhverju sem við höfum lært, þá erum við að nota þessa námstækni, æfingapróf. Til dæmis ef ég vel nokkur dæmi aftast í stærðfræðibókinni og reyni við þau án þess að kíkja á svarið, glósur eða fyrri dæmi, þá er ég að búa til æfingapróf fyrir mig og nota virka upprifjun.
Þegar ég er að kenna í kennslustofu, þá læt ég mína nemendur alltaf taka æfingapróf áður en þeir fara í alvöru prófið. Það próf er byggt upp á svipaðan hátt og alvöru prófið. Æfingaprófin hafa engin áhrif á einkunn og eina markmiðið með æfingaprófinu er að nemendur átti sig á því hvaða efni þeir kunna og hvaða efni þeir þurfa að læra betur. Ef unglingurinn þinn er að nota stærðfræðibókina Almenn Stærðfræði, þá getur hann nýtt sér Sjálfspróf aftast í kaflanum á sambærilegan hátt.
Sem sagt, ef unglingurinn þinn vill upplifa minni prófkvíða í stærðfræðiprófinu, þá er það besta sem hann getur gert, að læra fyrir prófið með því að búa til æfingapróf, þar sem hann velur nokkur dæmi úr efninu til prófs og notar svo virka upprifjun til að leysa dæmin (án þess að nota hjálpargögn).
Stress er gott þegar við erum að læra
Stress er ekki neikvætt. Rannsókn Cahill og félaga (1994) sýndi fram á að ef nemendur fengu kvíðalyf meðan þeir voru að læra, þá lærðu þeir minna! Þannig að ef unglingurinn þinn finnur fyrir smá stressi þegar hann er að læra, þá getur þú sagt honum að það sé gott því þá muni hann frekar það sem hann er að læra.
Við upplifum einnig stress á mismunandi hátt, eftir því hvernig við túlkum þessa upplifun að finna fyrir stressi. Við getum þjálfað okkur í því að nýta stress á jákvæðan hátt, sem þú getur lesið um hér.
Ef þú vilt vita meira um hvernig sé best að undirbúa sig fyrir stærðfræðipróf, þá mæli ég með því að þú lesir þennan pistil og einnig pistilinn um svindlmiðann.
Bestu kveðjur,
Gyða stærðfræðikennari
hjá stærðfræði.is
Heimildir
Agarwal, P., D’Antonio, L., Roediger, H. L., McDermott, K. B., & McDaniel, M. A. (2014). Classroom-based programs of retrieval practice reduce middle school and high school students’ test anxiety. Journal of Applied Research in Memory and Cognition, 3(3), 131–139. https://doi.org/10.1016/j.jarmac.2014.07.002
Cahill, L., Prins, B., Weber, M. & McGaugh, J. L. (1994). β-Adrenergic activation and memory for emotional events. Nature, 371, 702–704. https://doi.org/10.1038/371702a0
Dunlosky, J., Rawson, K. A., Marsh, E. J., Nathan, M. J. og Willingham, D. T. (2013). Improving students’ learning with effective learning techniques: Promising directions from cognitive and educational psychology. Psychological Science in the Public Interest, 14(1), 4–58. https://doi.org/10.1177/1529100612453266
Smith, A. M., Floerke, V. A., & Thomas, A. K. (2016). Retrieval practice protects memory against acute stress. Science (American Association for the Advancement of Science), 354(6315), 1046–1048. https://doi.org/10.1126/science.aah5067