Núna í vikunni kom út könnunar sem Maskína gerði varðandi viðhorf fólks til einkunna í grunnskólum. Niðurstaðan var að 2.6% svarenda fannst að gefa ætti einkunnir í bókstöfum, 88% fannst að gefa ætti einkunnir í tölustöfum og svo voru 9.4% sem var alveg sama.
Þegar ég byrjaði að kenna stærðfræði á framhaldsskólastigi, þá voru einkunnir í grunnskóla gefnar í tölustöfum (frá 0-10) og framhaldsskólinn var 4 ár. Þeir sem “féllu” (fengu undir 5), þurftu að taka einn undirbúningsáfanga í framhaldsskóla.
Ferli nemenda úr grunnskóla í framhaldsskóla, leit þá nokkurn vegin svona út:
Með tilkomu nýju aðalnámskrá grunnskólanna árið 2011 var lögð áhersla á að meta nemendur út frá hæfniviðmiðum og bókstafir kynntir til sögunnar. Það tók smá tíma að innleiða þessar breytingar en flestir grunnskólar voru farnir að gefa einkunnir í bókstöfum haustið 2014.
Ef framhaldsskólinn hefði ekki verið styttur, þá hefði ferli nemenda litið svona út:
En með styttingu framhaldsskólans, þá var ákveðið að núna ætti grunnskólinn að sjá um að kenna alla stærðfræði á þrepi 1. Það þýddi að ef nemendur náðu hæfni B við lok 10. bekkjar, þá fóru nemendur beint á þrep 2 í stærðfræði.
Það sem er svo ótrúlegt og stórfurðulegt, er að ekkert minnisblað eða tilskipun var komið áleiðis til grunnskólans. Allt í einu áttu þeir að fara að kenna seinna þrep 1, án þess að einhver segði þeim að gera það.
Eftir styttingu framhaldsskólans (með bókstöfum), þá lítur ferli nemenda svona út:
Mín skoðun og reynsla er sú að fyrir bókstafina og fyrir styttinguna, voru nemendur að koma mun betur undirbúnir í framhaldsskólann, enda átti grunnskólinn þá ekki að sjá um að fara yfir efni sem áður var kennt í framhaldsskóla. Nemendur voru því undantekningarlaust að fara í áfanga sem hentaði þeirra grunn í stærðfræði, þegar komið var í framhaldsskóla.
En eftir styttinguna og með tilkomu bókstafanna þá eru nemendur að raðast í áfanga sem hentar ekki endilega þeirra getustigi. Þeir skólar sem taka bara við nemendum sem fá B eða hærra og þeir skólar sem hafa svo mikla aðsókn að þeir geta valið eingöngu inn þá sem fengu B eða hærra, eru ekki að lenda í þessu vandamáli. Þeir eru að fá “bestu” nemendurna sem ráða þá við efnið sem kennt er í stærðfræði á þrepi 2.
En þeir skólar sem sjá um að taka við nemendum sem fá C eða D í grunnskóla, eru að fá nemendur sem eru með mjög ólíkan grunn í stærðfræði, þar sem bókstafurinn endurspeglar ekki endilega þeirra hæfni og grunn í stærðfræði.
Samkvæmt minni reynslu, þá eru margir nemendur sem fá C, en ættu að fá D og svo eru einhverjir nemendur sem fengu D en hefðu átt að fá C. Stundum velti ég fyrir mér hvort að grunnskólarnir geri sér grein fyrir hvaða áhrif þessir bókstafir hafi á innritun nemenda í framhaldsskóla.
Mér finnst oft eins og margir haldi að það skipti ekki máli hvort nemendur fái C eða D við lok 10. bekkjar í grunnskóla. Ég heyri oft sagt “Hvaða máli skiptir það? Það á að hleypa öllum inn í framhaldsskólanna.”
En það sem þessir aðilar átta sig ekki á, er að ef nemandi fær C við lok 10. bekkjar, þá er hann skráður í seinni áfanga á þrepi 1 í stærðfræði (sem áður tilheyrði framhaldsskólanum). Ef þetta er nemandi sem stendur ekki undir þeirri einkunn og hefur ekki þann grunn sem þarf til að ná tökum á því efni, þá mun hann líklega falla aftur og aftur í þessum sama áfanga eða vera færður niður í næsta áfanga á undan, á næstu önn. Við þetta tapast ein til tvær annir (jafnvel þrjár annir) hjá þessum nemanda – einungis vegna þess að hann var ekki skráður í áfanga í framhaldsskóla sem hæfði hans getustigi.
Bókstafir eru frábærir í stafrófsröð, en ekki endilega til að raða nemendum í rétta stærðfræðiáfanga í framhaldsskóla.
Ertu með einhverjar spurningar? Ef svo er, hikaðu ekki við að hafa samband, með því að svara þessum pósti.
Bestu kveðjur,
Gyða stærðfræðikennari
hjá staerdfraedi.is
PS.
Á myndunum í þessum pósti vísa ég í:
Allt með tölu, fyrri áfangi á þrepi 1
Stærðfræði 1, seinni áfangi á þrepi 1
Stærðfræði 2B, fyrri áfangi á þrepi 2
Allt með tölu, Stærðfræði 1 og Stærðfræði 2B eru stærðfræðibækur sem eru notaðar í sumum skólum í áföngum á þessum umræddu þrepum. Ástæðan fyrir því að ég set ekki inn heitið á hverjum áfanga er sú, að hver skóli hefur sitt eigið heiti á hverjum áfanga.