Síðasta fimmtudag hlustaði ég á viðtal við Magnús Þór Jónsson, formann Kennarasambandsins, á Speglinum á RÚV (RÚV, 2025). Í þessu stutta viðtali var hann meðal annars að tala um PISA prófin og að það mætti ekki láta þau próf sem lögð væru fyrir á þriggja ára fresti stýra of miklu “og forðast verður að festast í ákveðinni bóklegri afmarkaðri greind.”
Grunnskólakerfið á Íslandi miðast við að hver einstaklingur fái að njóta sín. Mér finnst margir túlka það þannig að það megi þá ekki lengur gera kröfur á nemendur.
Mitt mat er að allir nemendur þurfa að hafa skýran ramma, þar sem gerðar eru kröfur til þeirra, þar sem endurgjöf er einstaklingsmiðuð, hvetjandi og hlutlæg. Þannig getur hver einstaklingur fengið að njóta sín.
Það er einnig mitt mat að bókleg færni sé grunnur að lýðræði og jöfnuði. Það að hlífa nemendum við álag að þurfa að læra bóklegar greinar, er ekki að hjálpa þeim.
Velferð barna og unglinga er ekki andstæðan við kröfur. Þvert á móti tel ég að besta leið til að auka velferð nemenda, sé að styrkja sjálfstraust þeirra og gera kröfur um bóklega færni, gefa þeim tækifæri á að leggja eitthvað á sig og leyfa þeim að upplifa árangur erfiðisins.
Ég myndi vilja sjá miklu meiri kröfur á nemendur í grunnskólakerfinu, það er enginn greiði gerður með því að hlífa nemendum við miklu bóklegu námi.
Ég veit af eigin reynslu að flestir nemendur eru ekki að leggja á sig meira en þeir þurfa. Ég hef skrifað um reynslu mína að koma inn í umhverfi þar sem engar kröfur voru gerðar á nemendur, þú getur lesið þann pistil hér.
Ertu með einhverjar spurningar? Ef svo er, hikaðu ekki við að hafa samband með því að svara þessum pósti.
Bestu kveðjur,
Gyða stærðfræðikennari
Hjá https://staerdfraedi.is/
Heimild
RÚV. (2025, ágúst 1). Spegillinn [Útvarpsþáttur].
https://www.ruv.is/utvarp/spila/spegillinn/25249/ajsf99