Þegar ég hitti foreldra sem eiga nemendur í 10. bekk þá segi ég þeim oft frá því hvernig einkunnir í stærðfræði í 10. bekk eru flokkaðar í framhaldsskólunum – þá verða þeir oft mjög hissa sem er ekki skrítið…
Í stuttu máli þá er mjög mikill munur á því hvort nemandi fær B eða C+ í stærðfræði í 10. bekk
Því einungis nemendur sem fá B eða hærra geta farið í framhaldsskólastærðfræði (strærðfræði á 2. þrepi). Það þýðir að nemendur sem fá C+ eða lægra þurfa að verja einum og jafnvel tveimur önnum í framhaldsskóla að vinna sig upp í framhaldsskólastærðfræði. Einnig þýðir það að nemendur sem ná ekki B eða hærra komast ekki inn í skóla með bekkjarkerfi, þar sem þeir skólar bjóða ekki upp á undirbúningsáfanga í stærðfræði.
Hérna er nánari útskýring á því hvernig einkunnir í 10. bekk eru metnar í framhaldsskólum.
Nemendur sem fá A, B og B+ í lokaeinkunn í stærðfræði í 10. bekk geta byrjað strax í framhaldsskólastærðfræði sem er kallað stærðfræði á 2. þrepi. Þessir nemendur geta sótt um í framhaldsskóla með bekkjarkerfi.
Nemendur sem fá C eða C+ í stærðfræði í 10. bekk þurfa að fara í einn undirbúningsáfanga á 1. þrepi. Hver áfangi tekur eina önn svo þeir geta ekki byrjað í framhaldsskólastærðfræði fyrr en eftir eina önn. Þessir nemendur geta ekki sótt um framhaldsskóla með bekkjarkerfi.
Nemendur sem fá D í stærðfræði í 10. bekk þurfa að fara í tvo undirbúningsáfanga á 1. þrepi. Það þýðir að þeir nemendur þurfa tvær annir (eittt skólaár) til að vinna sig upp í framhaldsskólastærðfræði. Þessir nemendur geta ekki sótt um framhaldsskóla með bekkjarkerfi.
Þó ég tiltaki sérstaklega stærðfræði þá eiga sömu reglur við um íslensku og ensku. Þetta eru svokölluðu kjarnafögin sem krefjast þess að nemendur hafi góðan grunn þegar þeir koma inn í framhaldsskólann.
Fyrir nokkrum árum þegar framhaldsskólinn var fjögur ár og grunnskólarnir notuðu einkunnir í tölustöfum þá var þetta mun einfaldara. Þeir sem náðu (fengu 5 eða hærra) komust beint í framhaldsskólastærðfræði en þeir sem féllu (fengu lægra en 5) tóku einn undirbúningsáfanga (oft kallað núlláfanga) áður en þeir gátu byrjað á framhaldsskólastærðfræði.
En þegar framhaldsskólinn var styttur úr fjórum árum í þrjú ár, þá var ákveðið að það sem áður var fyrsta árið í stærðfræði í framhaldsskóla ætti að vera kennt í grunnskóla. Grunnskólinn breytti ekki sínum kennsluaðferðum eða bókum til að mæta þeim breytingum og á svipuðum tíma tóku grunnskólarnir upp einkunnakerfi í bókstöfum. Niðurstaðan á þessum miklu breytingum var sú að til að komast beint á 2. þrep í framhaldsskóla úr grunnskóla þurfa nemendur að fá B eða hærra í lokaeinkunn í 10. Bekk.
Gyða stærðfræðikennari